Il cjant de Filologjiche Furlane
dal Quartetto Vocale Armonia
Efemérides de América y el Friûl

19 Novembar 1919
Nassite de Societât Filologjiche Furlane

La Societât e promôf la cognossince des lenghis e des culturis di minorance, e lis considere imprescj di pâs tal mont e di fradilance tra i popui.

La Societât Filologjiche Furlane e nassè a Gurize ai 23 di Novembar dal 1919 in graciis de iniziative di oms di culture une vore nomenâts come Giovanni Lorenzoni, che al fo il so prin President, Bindo Chiurlo, Ugo Pellis, Ercole Carletti. E deventà Ent Morâl cul R.D.L. dai 7 di Avost dal 1936. E puarte il non di Graziadio Isaia Ascoli, il grant glotolic gurizan dal secul passât, ch'al fondà i studis di dialetologjie in Italie e che nus à regalade la prime descrizion sientifiche dal furlan tai Saggi ladini, publicâts tal numar di scree dal Archivio Glottologico Italiano (1873). Chestis a son lis finalitâts de Societât, enunciadis tal articul 1 dal Statût: promovi e slargjâ l’ûs de lenghe furlane, prudelâ e valorizâ la minorance linguistiche furlane, studiâ, cognossi e incressi la cussience dai problemis culturâi dal Friûl par dut ce che al rivuarde la lenghe, la filologjie, la leteradure, l’insegnament, la formazion culturâl e professionâl, la storie, l'art, la musiche e il spetacul, lis arts e lis tradizions popolârs, il studi, la conservazion, il restaur e la valorizazion dai bens culturâi tant movii che no movii, tant materiâi che no materiâi, che a vedin un particolâr interès linguistic, architetonic, artistic, storic, archeologjic, etnografic, museâl, sientific, bibliografic e archivistic par che ducj a puedin gjoldint.

Insiorade di une tradizion di studis seguitive, sostignude di plui di 3.000 socis e ative su dut il teritori dal Friûl storic, la Filologjiche e je une des primis referencis culturâls de nestre Regjon. La Societât e ten une rêt di contats profitevule cun associazions, ents publics e privâts, Universitâts talianis e forestis e cun altris minorancis linguistichis. E à promovude e sostignude la realizazion di impuartantis indagjins linguistichis e etnografichis, come l'Atlante Linguistico Italiano e l'Atlante Storico Linguistico Etnografico Friulano.

Il Ciant de Filologiche Furlane

Un salût e Furlanie,
da lis monz insìn al mar:
donge il mar il sanc dai martars,
su lis monz il lor altàr!

E la nestre ciare Lenghe
va des monz fin al Timâf:
Rome ‘e dis la so lïende,
sul cunfin todèsc e sclâf.

Che tu cressis, mari Lenghe
grande e fuarte, se Diou ûl;
che tu slargis la to tende
su la Ciargne e sul Friul;.

che tu vadis, mari Lenghe
sèrie e sclete intòr intòr:
tu confuarte dut chest popul,
salt, onèst, lavoradòr

Test di Bindo Chiurlo
Musiche di Arturo Zardini

Fuente

• http://www.filologicafriulana.it/