Un espacio para difundir las actividades de los fogolares del mundo.
Un sito per diffondere le attività dei fogolârs ator pal mont.


135 agns di emigrazion furlane ae Argjentine e Uruguai, i mistîrs che chei furlans a cognossevin e che a son bielzà pierdûts, culì e intal Friûl.

I emigrants a jemplavin lis lôr valîs cun lis pocjis robis che a savevin che a podevin scjavaçâ la grande aghe: une cite pe polente -Cui saial cuant che o tornarìn a mangjâle...- il vistît di nuvice che lu vevin cusît jenfri dutis lis feminis de cjase, une foto dai vons la sole volte che a jerin lâts te grande citât (tant che un lus che no spietavin...) ...e un grum di insiums, promessis e sperancis.

Ma a puartavin ancje la lôr cognossince, imparade dai grancj: il profont savê su la tiere, il clime, i nemâi e i materiâi.

Tant che un arlêf, cetantis oris di pazience puartant i nemâi a passonâ, o arant daûr dal mus, o te farie dal mestri, eseguint cui siei voi ogni moviment par no pierdi nancje un piçul detai. Un mistîr che i vierzarès lis puartis dal gnûf mont, e i vuadagnarès il pan par dute la famee. Un savint che lôr a trasmetaressin ai lôr fîs.

Tancj di chei mistîrs no podevin jessi fats inte gnove tiere, o no saressin lucratîfs. O tancj si mudaressin par cumbinâsi a chei altris materiâi. O in mût sclet a saressin puartâts de maree dal timp e il progrès modern.

Riscatâju al è vierzi une barconete al pasât. Puartâ une altre volte ae vite i nons dai mistîrs e dai ogjets, scoltâts de bocje dai vieris in marilenghe. E cun di plui ricuardâ il Friûl tant ce che al è stât cetant timp indaûr.

No si trate dome di nostalgjie. Al è rindi un omaç. Al è viodi di che pont o sin partîts, par preseâ il presint e vandi l'avignî.

Eduardo Dino Baschera

Mistîrs
Lunari de Societât Operarie di Socors Mutuâl e Istruzion di Cividât
Mistîrs

Inte cheste produzion fotografiche e di ricercje storiche, si presentin i mistîrs inte lôr dimension plui tipiche de vore artesane. Sclets e antics  mistîrs, necessaris par dâ rispueste aes esigjencis cuotidianis des fameis de comunitât. Salacor parcè che cuant che si jere a vore no nd'jere timp di fâsi fotografiis, al è che chestis personis no vevin la atenzion dai obietîfs professionâi, no son cuasi stâts cjapâts tai mots ripetitîfs, sempliçs, ma inelutabilmentri perfets che a tornin la materie crude dei elements in manufats, in ogjets di ûs cuotidian, in imprescj e di spes in piçulis oparis mestris di art.

La Societât Operarie di Cividât, adun cun la Scuele di Arts e Mistîrs, e à formât arlêfs jenfri 1879 e 1916, specializâts tant che marangons, muradôrs, faris, marmiscj, oresins, batirams, decoradôrs, sartôrs, cjaliârs, e altris tancj cuâi tipografs, pitôrs, e vie indenant.
Cussì o podìn fermânus sui mots, su lis mans che cun abilitât e àn fat dai ogjets de cuotidianitât piçui tesaurs di tignî su cun amôr, e parcè no, a scuvierzi par un moment la voie di deventâ sartôrs pancôrs, marangons, mecanics, batirams.